Hópanámskeið – Litla menntabúðin

Í Borgarbyggð er mikill mannauður á hverjum bæ. Litla menntabúðin er svo heppin að hafa fengið til liðs við sig þrjár kjarnakonur úr byggðinni sem ætla að sjá um námskeiðsdaga fyrir hópa. Gist er á Fosshóteli ef þess er óskað og hægt er að fara í spa í Krauma. Einnig er hægt að skipuleggja heimsókn á hestabúgarð, leiðsögn um héraðið, hellaferðir, handverkstæði og svo mætti lengi telja.

Ingibjörg Inga Guðmundsdóttir

Ingibjörg mun vinna með viðfangsefni jákvæðrar sálfræði er tengjast virðingu, hugarfari og styrkleikum. Hún leggur áherslu á mikilvægi þess að stjórnendur, leiðtogar og kennarar vinni að góðum liðsanda á vinnustað með það að leiðarljósi að ná betri árangri. Ingibjörg Inga er íþróttafræðingur heilsuþjálfari og kennari að mennt og er með diplómanám á meistarastigi í jákvæðri sálfræði. Hún hefur lengst af starfað sem sem kennari og þjálfari og síðustu 11 ár sem skólastjórnandi.

Kristín Á. Ólafsdóttir

Kristín mun vinna með hópnum á sviði tjáningar og samskipta. Áherslan er á hópinn sjálfan, að auka kynni innan hans og efla margvíslega tjáningu þátttakenda. Kristín er leikari og uppeldis- og menntunarfræðingur að mennt. Hún kenndi til skamms tíma tjáningu í töluðu máli, leiklist í skólastarfi og samskipti á Menntavísindasviði HÍ.

Ása Erlingsdóttir

Ása mun kynna leikjatengt útinám. Helstu áherslur eru á flæði kennslunnar og uppbyggingu námsins ásamt hugmyndum Joseph Cornell á því hvernig nám fer fram í gegnum leiki og reynslu. Skynjun, upplifun, athygli, virðing, samvinna og samskipti skipa þar stóran sess. Einnig verður komið inn á grunnþætti útieldunar í tengslum við útinámið. Ása er grunnskólakennari og garðyrkjufræðingur að mennt ásamt því að hafa sótt námskeið hjá Joseph Cornell í þeim kenningum sem hann leggur til grundvallar í útinámi og hefur gert í rúmlega þrjá áratugi.